កិច្ចប្រជុំជាមួយក្រុមហ៊ុននាំចេញអង្ករ " Exporter is the Ambassador of Our Rice Industry " សហព័ន្ធស្រូវអង្ករកម្ពុជា បានរៀបចំកិច្ចប្រជុំពិសេសជាមួយក្រុមហ៊ុននាំចេញ ក្រោមអធិបតីភាព ឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា និង លោក ចាន់ សុខទី អគ្គនាយកក្រុមហ៊ុនហ្គ្រីនដ្រេត នៃក្រសួងពាណិជ្ជកម្ម ដោយមានការចូលរួមពីម្ចាស់និងតំណាងក្រមហ៊ុននាំចេញចំនួន៤៥នាក់ ក្រោមការរៀបចំរបស់លេខាធិការដ្ឋានសហព័ន្ធស្រូវអង្ករកម្ពុជា។ កិច្ចប្រជុំនៅថ្ងៃទី២៦ខែឧសភាឆ្នាំ២០១៧នេះផ្តោតសំខាន់លើការអនុវត្តផែនការនាំចេញទៅកាន់ទីផ្សារប្រទេសចិនជាមួយក្រុមហ៊ុនដែលមានឈ្មោះក្នុងពេលកន្លងមក និង ការពិភាក្សាលើការបញ្ជូនឈ្មោះលើកទី២ទៅកាន់ភាគីចិន ដែលសមាជិកបានស្នើមកកាន់សហព័ន្ធ និងក្រុម ហ៊ុនហ្គ្រីនដ្រេត សម្រាប់នាំចេញទៅកាន់ប្រទេសចិន។ កិច្ចប្រជុំនេះក៏មានការអញ្ជើញចូលរួម ពីអនុប្រធានសហព័ន្ធស្រូវអង្ករកម្ពុជា រួមមានៈ ឧកញ៉ា ហ៊ុន ឡាក់ ឧកញ៉ា វង្ស ប៊ុនហេង ឧកញ៉ា ច្រាយ សុន លោក នង វាសនា និង ឧកញ៉ា ភូ ពុយ ដែលជាអតីតៈក្រុមប្រឹក្សាភិបាលក្នុងអាណត្តិទី១។ ការរៀបចំការពិភាក្សានេះឡើង ដើម្បីប្រមូលមតិយោបល់ពីភាគីនាំចេញសំខាន់ៗ ដើម្បីរៀបចំយុទ្ធសាស្រ្តនាំចេញឲ្យកាន់តែមានប្រសិទ្ធភាព ឆ្លើយតបទៅនឹងតម្រូវការទីផ្សារនិងតម្លៃសមស្រប រួមចំណែកដល់ការកាត់បន្ថយសម្ពាធមួយចំនួនដល់សមាជិករបស់ខ្លួន ព្រោះការនាំចេញក្នុងពេលកន្លងមកប្រឈមយ៉ាងខ្លាំងទាំងតម្លៃនិងរបៀបនៃការនាំចេញ។ ទីផ្សារនាំចេញជាដង្ហើមរស់របស់វិស័យស្រូវអង្ករនៅកម្ពុជា។ ការរៀបចំយុទ្ធសាស្ត្របានត្រឹមត្រូវនឹងនាំឲ្យវិស័យស្រូវអង្កររីកចម្រើន ហើយកសិករនឹងមានឱកាសរីកចម្រើនទាំំងប្រាក់ចំណូលនិងជីវភាពរស់នៅ។ លោក ចាន់ សុខទី អគ្គនាយកក្រុមហ៊ុនហ្គ្រីនដ្រេតនៃក្រសួងពាណិជ្ជកម្ម បានលើកឡើងថា រហូតមកដល់ពេលនេះ ការនាំចេញទៅកាន់ទីផ្សារចិន សម្រេចបានប្រហែលពាក់កណ្តាលនៃកូតា២០ម៉ឺនតោន ហើយ សង្ឃឹមថា ការនាំចេញទៅកាន់ទីផ្សារចិននឹងគ្រប់ចំនួននៅចុងឆ្នាំ។ លោកបានលើកឡើងថា កូតាសម្រាប់ឆ្នាំក្រោយ នឹងត្រូវជជែកឲ្យបានស៊ីជម្រៅនៅពេលក្រោយ ដើម្បីឲ្យការនាំចេញបានល្អ តែជាទូទៅភាគីចិនតែងតែបំពេញកូតាឲ្យគ្រប់ចំនួន ហើយតម្លៃនឹងមិនមានការប្រកួតប្រជែងខ្លាំងដូចពេលដំបូងនោះទេ។ ឯកឧត្តម សុខ ពុទ្ធីវុធ ប្រធានសហព័ន្ធស្រូវអង្ករកម្ពុជា បានអះអាងថា ការសហការគ្នាក្នុងចំណោមអ្នកនាំចេញនិងរោងម៉ាសីុនគឺជារឿងសំខាន់ក្នុងការរួមគ្នាធ្វើការងារឲ្យបានល្អ និងដល់គោលដៅ បើមិនដូច្នោះទេ ការលំបាកនឹងបន្តកើតមានចំពោះវិស័យស្រូវអង្ករ។ ឯកឧត្តមប្រធាន មានប្រសាសន៍ថា៖«ខ្ញុំចង់បើកឱកាស តែខ្ញុំមិនឲ្យឱកាសឈ្មោះគ្នានោះទេ ខ្ញុំចង់ឃើញការសហការគ្នារវាងសមាជិក។ ឯកឧត្តម សុខ ពុទ្ធីវុធ បានលើកឃ្លាមួយថា " Exporter is the Ambassador of Our Rice Industry " ចង់អោយក្រុមហ៊ុននាំចេញដើរតួប្រៀបដូចជាអគ្គរាជទូតសម្រាប់វិស័យស្រូវអង្ករកម្ពុជានៅលើទីផ្សារអន្តរជាតិ។