ក្រុមហ៊ុនហ្រ្គីនត្រេដ ហៅកាត់ថា "កហត" ត្រូវបានរាជរដ្ឋាភិបាល បង្កើតឡើងនៅឆ្នាំ ១៩៩៦ ដោយអនុក្រិតលេខ៧២ អនក្រ.បក ចុះថ្ងៃទី២៣ ខែវិច្ឆកា ឆ្នាំ១៩៩៨។ កហត ត្រូវបានរួមបញ្ចូលដោយក្រុមហ៊ុន របស់រដ្ឋចំនួន៤ គឺ៖ ក្រុមហ៊ុនស្បៀងកម្ពុជា, ក្រុមហ៊ុនសំភារៈបរិក្ឋារ, ក្រុមហ៊ុនប្រមូលទិញ និងក្រុមហ៊ុនដឹកជញ្ជូនពាណិជ្ជកម្ម "កាំត្រង់" ដោយមានការដឹកនាំពីក្រុមប្រឹក្សាភិបាល ៧រូប និងមន្រ្តីត្រួតពិនិត្យរដ្ឋ ១រូប ដែលតំណាងឲ្យក្រសួង ៥ គឺ តំណាងក្រសួងពាណិជ្ជកម្ម១រូប, តំណាងក្រសួងសេដ្ឋកិច្ច និង ហិរញ្ញវត្ថុ១រូប, តំណាងទីស្តីការគណៈរដ្ឋមន្រ្តី១រូប, តំណាងក្រសួងកសិកម្ម១រូប, និង តំណាងក្រសួងផែនកា ១រូប រួមទាំងតំណាងនិយោជិតរបស់ក្រុមហ៊ុន១រូប និងអគ្គនាយកក្រុមហ៊ុនហ្រ្គីនត្រេដផង។ កហត មានភារៈកិច្ចធ្វើពាណិជ្ជកម្ម និង សេវាកម្ម ទៅលើមុខទំនិញស្បៀង និង ម្ហូបអាហារជាមូលដ្ឋានដោយផ្ទាល់ នៅក្នុងក្របខ័ណ្ឌក្នុង និង ក្រៅប្រទេស។ កហត មាន ទំរង់ជាសហគ្រាសសាធារណៈ ដែលគ្រប់គ្រងផ្នែកបច្ចេកទេសដោយ ក្រសួងពាណិជ្ជកម្ម និង ផ្នែកហិរញ្ញវត្ថុដោយក្រសួងសេដ្ឋកិច្ច និងហិរញ្ញវត្ថុផងដែរ។